Inicio >> Produtos

 

QUE É UN PRODUTO DE COMERCIO XUSTO?

É aquel elaborado por grupos desfavorecidos de países en vías de desenvolvemento e que chega ás tendas dos países ricos asegurando un prezo xusto para as/os produtoras/es, que lles permita vivir de forma digna. Estes produtos abranguen varios sectores:

• Alimentación: café, té, azucre, chocolate, froitos secos, galletas, mel, marmelada, couscous, ron, caipiriña,pastas, cereais...
• Artesanía: obxectos de decoración, papelería, xoguetes, bixutería, bolsos, mochilas, xogos infantís,cestos, mobles...
• Téxtil: complementos de vestir, roupa para o fogar, panos, tapicería,...

Podemos, pois, mercar produtos de calidade contrastada e, a un tempo, contribuír ao desenvolvemento económico e social dos países e zonas máis pobres.

Cómpre sinalar que algúns destes produtos ás veces veñen con etiquetas que indican que se fabricaron en Europa. Hai varios motivos que o explican:

• Algúns produtos están compostos por materias primas procedentes de varios países. Estas serven para elaborar o produto final nunha industria europea. Exemplo disto témolo no chocolate, que pode estar composto por cacao de África e azucre de Sudamérica, e ser elaborado en Europa.
• Os aranceis que hai que pagar na alfándega aumentan en relación co grao de elaboración. Un exemplo é o caso do café, do que se importa o gran verde debido a que ataxa a pagar é menor que para o gran tostado e dende logo máis baixa que para o produto envasado.

XUSTO: UN BO PREZO

¿Como se reparte o prezo final dun pantalón vaqueiro?

• Beneficio da tenda, gastos xerais e outros: 34%
• Beneficio da marca, gastos xerais e de promoción: 25%
• IVE: 16%
• Custos material, beneficio e salarios da fábrica (Europa do Leste):13%
• Transporte, taxas e importación: 11%
• A/o traballadora/or recibe: 1%

(Fonte: Campaña roupa Limpia. Setem)

PRODUTOS CON SELO DE GARANTÍA

Como resulta doado comprender, o comercio xusto precisa dunhas garantías que aseguren que os produtos se fabrican tal e como vimos describindo. Esta necesidade fíxose evidente, en especial, a partir da presenza de artigos co reclamo de xustas en puntos de venda distintos ás propias tendas solidarias, polo que se comezaron a implantar os denominados selos de garantía, estendidos por organizacións responsables da correspondente certificación.

Estas asociacións establecen os criterios específicos para cada produto, manteñen un rexistro de produtoras/es, e fan auditorías periódicas.

España non conta aínda cun selo de garantía propio, aínda que tras varios anos de debate aprobouse en marzo de 2004 a creación dun selo específico. Mentres tanto, ademais da garantía que representa a propia organización implicada neste comercio solidario, tense como punto de referencia á Coordinadora Estatal de Organizacións de Comercio Xusto. As súas funcións son as de promover este tipo de comercio e garantir que as entidades adscritas cumpran os requisitos establecidos.

Selos de garantía existentes na actualidade:

Max Havelaar. É o primeiro certificado de garantía que se creou. Nace en Holanda no ano 1988, destinado unicamente ao café. Nestes momentos está en vigor en Holanda, Bélxica, Suíza, Dinamarca e Francia, e está destinado ao café, cacao, chocolate e mel.

Transfair. Nace en Alemaña. Hoxe en día está instaurado en Austria, Italia, Luxemburgo, Canada e Xapón. Este selo avala varias marcas de café, té, chocolate, azucre e mel.

Fair Trade. Certifica principalmente o café, o té e o chocolate que se vende no Reino Unido e en Irlanda.

No ano 1997, Max Havelaar, Transfair e Fair Trade uníronse para constituír a Organización Internacional de Etiquetado do Comercio Xusto(Fair-trade Labelling Organization International, FLO).

No 2002, FLO crea un selo único que sistematiza os selos que se atopan en vigor en catorce estados europeos (proximamente tamén o selo español) e ademais en Estados Unidos, Canadá e Xapón.

FLO verifica periodicamente, cando menos unha vez ao ano, a actuación tanto dos/as produtores/as rexistrados como das importadoras.

ALGÚNS DATOS NUMÉRICOS SOBRE O COMERCIO XUSTO

• O comercio xusto representa o 0,01% do comercio mundial, ten uns 65.000 puntos de venda e emprega a 125.000 persoas.
• En Europa as vendas alcanzan un importe de 260 millóns de euros.
• En España, no ano 2003 a cifra de vendas ascendeu a 10.660.000 euros, un 53% máis que no ano 2000.
• Desta cifra de vendas, Galicia contribuíu con 390.000 euros, un 47% máis que no 2000.
• En España, no ano 2003, o sector predominante en volume de vendas foi a alimentación, que dende o ano 2000 experimentou un crecemento anual superior ao 20%. Este aumento significativo explícase, en gran medida polo incremento das vendas de café de forma sostida. Actualmente é o produto que máis contribúe ao volume total de vendas, cun 19% en 2003. En artesanía, os que máis contribuíron foron os artigos de decoración e os complementos.
• Xa son 6 millóns as/os produtoras/es do Sur que se están a ver beneficiadas/ os polo comercio xusto.